वारणा नदीत महिलेचा मृतदेह सापडला Woman's body found in Warna River

 शिराळा,ता.१४:चरण (ता.शिराळा) येथे करकव मळ्यात  विष्णू नायकवडी यांच्या शेतात नजिक असणाऱ्या विद्युत मोटार च्या जवळ वारणा नदीत असणाऱ्या किंजळाच्या झाडाला अडकलेल्या अवस्थेत महिलेचा मृतदेह आढळून आला. कुरळप पोलीस ठाण्यात बेपत्ता असलेल्या तक्रारी वरून तो मृतदेह सौ.अमृता सागर कांबळे (वय२३) रा.वशी ता.वाळवा हिचा असल्याचे पोलीस तपासात निष्पन्न झाले आहे. आकस्मित मृत्यू म्हणून प्राथमिक नोंद कोकरूड पोलिसात झाली आहे.

ही घटना मंगळवारी (१४ जानेवारी २०२५ ) सकाळी उघडकीस आली. याबाबत  कोकरूड पोलिसात मारुती आनंदा घोलप रा.चांदोली वसाहत बागणी यांनी फिर्याद दिली आहे.

याबाबत घटनास्थळ व कोकरूड पोलिसांनी दिलेली माहिती अशी,आज मंगळवारी सकाळी नऊ वाजण्याच्या सुमारास शाहूवाडी तालुक्यातील सोंडोली येथील शेतात आलेल्या लोकांना वारणा नदीत  चरण (ता.शिराळा) हद्दीत किंजळाच्या झाडास महिलेचा मृतदेह अडकलेल्या अवस्थेत दिसला.त्यांनी चरण येथील ओळखीच्या असणाऱ्या लोकांना माहिती दिली. त्यांनी चरणचे पोलीस पाटील अजित चव्हाण यांना माहिती दिली. चव्हाण यांनी कोकरूड पोलिसांना याबाबत कळवले. यावेळी घटनास्थळी सहायक पोलीस निरीक्षक जयवंत जाधव,पोलीस हवालदार, राजेंद्र माने,पोलीस नाईक एन.जी.पवार,पोलीस हवालदार भाग्यश्री खोत यांनी भेट दिली. स्थानिक नागरिकांच्यावतीने सडलेल्या अवस्थेत असणारा मृतदेह बाहेर काढण्यात आला. त्या ठिकाणी पंचनामा करण्यात आला.मृतदेहाचा चेहरा सडलेल्या अवस्थेत असल्याने ओळख पटणे अवघड होते.त्यामुळे कोकरूड पोलिसांनी शिराळा,वाळवा,व शाहूवाडी तालुक्यातील पोलीस ठाण्यात कोणी महिला बेपत्ता आहे का याची चौकशी केली.त्यावेळी वशी येथील अमृता कांबळे ही विवाहिता ३ जानेवारी दुपारी साडे बारा वाजता घरात कोणाला काही न सांगता निघून गेली असल्याची फिर्याद कुरळप पोलिसात नोंद होती.त्या नुसार नातेवाईक यांना बोलावून मृतदेह पाहिला असता तिच्या कानात असणार झुमका व हातात बांधलेल्या दोऱ्या वरून ती अमृता असल्याची खात्री पटली.कोकरूड येथे येथे शवविच्छेदन करण्यात आले.पुढील तपास हवालदार नागनाथ पवार करत आहेत.

अभिषेक काळे हा चांदोली येथे पोहण्यासाठी वारणा नदीत उतरला असता रविवारी बुडाला.त्याचा शोध सुरु असल्याने वारणा धरणातून वारणा नदी सोडलेले पाणी बंद करण्यात आले होते.त्यामुळे वारणा नदीचे पाणी कमी झाल्याने चरण येथील किंजळाच्या झाडास अडकलेला  महिलेचा मृतदेह सहज दृष्टीस पडला.

एकाच दिवशी दोन मृतदेह नदीत सापडले 

चांदोली येथे रविवारी कोडोली येथील पर्यटनासाठी आलेला युवक  अभिषेक काळे हा पोहण्यासाठी नदीत उतरला असता बुडाला होता.त्याचा मृतदेह दोन दिवस सापडला नव्हता.आज सकाळी उखळू( ता.शाहूवाडी) च्या हद्दीत तिसऱ्या दिवशी मृतदेह सापडला.चरण येथे वारणा नदीत महिलेचा मृतदेह आज आढळून आल्याने एकाच दिवशी दोन मृतदेह आढळले.