दुकानाला भीषण आग;३० लाखांहून अधिक साहित्यांचे नुकसान

मिरज :११ नोव्हेंबर  मिरजेतील वैरण बाजार येथील मुकेश भोजमलानी यांच्या धनलक्ष्मी किराणा स्टोअर या तीन मजली किराणा मालाच्या दुकानास सोमवारी (ता. ११) रात्री साडेनऊच्या सुमारास भीषण आग लागली. या आगीत अंदाजे ३० लाखांहून अधिक साहित्यांचे नुकसान झाले. दरम्यान, अग्निशमन दलाच्या बंबांनी दोन तासांच्या शर्थीच्या प्रयत्नाने आगीवर नियंत्रण मिळवले.

 

घटनास्थळावरून मिळालेली माहिती अशी की, मिरजेतील वैरण बाजार येथील किराणा दुकानाला रात्री उशिरा आग लागली. दिवाळीमुळे खाद्यतेलांचे डबे आणि इतर ज्वलनशील पदार्थ सर्वाधिक असल्यामुळे आगीने क्षणार्धात तीन मजली इमारतीस व्यापून टाकले.महावितरणच्या कर्मचाऱ्यांनी तातडीने धाव घेत वीजपुरवठा खंडित केल्यामुळे पुढील अनर्थ टळला.