गणेशोत्सव व दहीहंडी प्रमाणे नागपंचमीसाठी सहकार्य करा- सत्यजित देशमुख | Cooperate for Nag Panchami like Ganeshotsav and Dahi Handi

गणेशोत्सव व दहीहंडी प्रमाणे नागपंचमीसाठी सहकार्य करा- सत्यजित देशमुख | Cooperate for Nag Panchami like Ganeshotsav and Dahi Handi - Satyajit Deshmukh

Shiv News July 27, 2022

शिराळा,ता.२७: राज्य शासनाने गणपती व दहीहंडी उत्सवासाठी कोरोनामुळे घातलेले सर्व निर्बंध काढून सर्व गणेश फक्त व दहीहंडी उत्सव प्रेमी, यांचा उत्साह द्विगणित होईल असा निर्णय घेतला आहे.या निर्णयाचे स्वागत सर्व स्तरातून होत आहे. त्याच पद्धतीने शिराळ्याच्या नागपंचमीसाठी देखील नागप्रेमी व भाविक भक्तांच्या मागणीचा विचार करून प्रशासनाने सहकार्य करावे अशी मागणी राज्याचे मुख्यमंत्री एकनाथ शिंदे व उपमुख्यमंत्री देवेंद्र फडणवीस यांच्याकडे केली असल्याची माहिती जिल्हा परिषद माजी उपाध्यक्ष, सांगली जिल्हा बँक संचालक सत्यजित देशमुख यांनी दिली.

यावेळी देशमुख म्हणाले, कोरोनाच्या काळात सलग दोन वर्षे सण साजरे करण्यासाठी प्रशासनाने निर्बंध घातले होते. या निर्बंधांचे पालन सर्व भाविक भक्त व नागरिकांनी काटेकोर केले.राज्याचे मुख्यमंत्री एकनाथ शिंदे व उपमुख्यमंत्री देवेंद्र फडणवीस यांनी यावर्षी गणपती उत्सव व दहीहंडी उत्सव साजरे करण्याचे सर्व निर्बंध उठवले आहेत. त्याच पद्धतीने शिराळा नागपंचमी उत्सवाला प्रशासनाने सहकार्य करावे.

हा सण शिराळा व परिसरातील नागरिकांच्या जिव्हाळ्याचा आहे. त्यामुळे हा उत्सव साजरा करण्यासाठी नागरिकांना निर्बंध घालू नये. न्यायालयाच्या निर्णयाचा मान राखून सर्व नागमंडळ व नागप्रेमी हा उत्सव मोठ्या उत्साहात साजरा व्हावा.यासाठी प्रशासनाने सहकार्य करावे. शिराळकर यांच्या उत्साहाला प्रशासन सर्व सहकार्य करेल.अशी ग्वाही त्यांनी दिली.