महावितरणच्या लेखी आश्वसाननंतर मोर्चा तात्पुरता स्थगित | After the written assurance of Mahavitaran, the movement was temporarily suspended

Shiv News July 19, 2022

शिराळा,ता.१९: आरळा ता.शिराळा येथील महावितरण कार्यालयावर वारंवार खंडित होणाऱ्या विद्युत पुरवठ्याच्या निषेधार्थ निघणारा मोर्चा महावितरणचे उपकार्यकारी अभियंता प्रल्हाद बुचडे यांनी ग्रास्थांंची भेट घेवून त्यांना अडचणींचे निवारण करण्याचे लेखी आश्वासन दिल्याने मणदूर ग्रामस्थांनी मोर्चा तात्पुरता स्थगित केला.

यावेळी सरपंच वसंत पाटील यांनी महावितरणच्या अधिकाऱ्यांना धारेवर धरत लोकांच्या व्यथा मांडल्या. यावेळी पाटील म्हणाले, मणदूर गाव हे अभयारण्या लगत आहे. येथे हिस्त्र प्राण्या पासून ग्रामस्थ व पाळीव प्राण्यांना त्रास होत आहे. अतिवृष्टीमुळे डोंगर खचणे असे प्रकार घडत आहेत . महावितरणच्या गलथानपणामुळे आठ आठ दिवस वीज गायब असते. रात्रीच्या प्रकाशासाठी मेणबत्त्या किती वापरणार व केरोसीन मिळत नाही. त्यामुळे लोकांचे जीवन विस्कळीत झाले आहे.

वीज नसल्याने पाणी पुरवठा , दळप , कांडप बंद. पंखे बंद असल्याने रात्रीचा डासांचा त्रास होत असल्याने लोकांच्या आरोग्याचा प्रश्न निर्माण झाला आहे. नैसर्गिक आपत्ती बरोबर महावितरणच्या गलथानपणामुळे आणखी समस्या वाढत आहेत. यावेळी सुरळीत विद्युत पुरवठा केला जाईल असे अधिकार्यांनी लेखी आश्वासन दिल्याने मोर्चा तात्पुरता स्थगित करण्यात आला. यावेळी कोणताही अनुचित प्रकार घडू नये म्हणून कोकरूड पोलीस ठाण्याचे सहाय्यक पोलीस निरीक्षक ज्ञानदेव वाघ यांनी बंदोबस्त ठेवला होता.