म्हणून या गावाने दिला जलसमाधी आंदोलनाचा इशारा | So this village gave the signal of Jalasamadhi movement

शिराळा: कोल्हापूर व सांगली जिल्हा जोडणाऱ्या वारणा नदीवरील मांगले -काखे पुलाचे रखडलेले काम येत्या ३० नोव्हेंबर पूर्वी सुरू न झाल्यास १ डिसेंबर रोजी सकाळी ११ वाजता काम बंद असलेल्या वारणा नदीवरील पुलाजवळ जलसमाधी आंदोलन कऱण्याचा इशारा मांगले (ता शिराळा) येथील ग्रामस्थांनी निवेदनाद्वारे तहसीलदार गणेश शिंदे यांना दिला आहे.

कोल्हापूर, सांगली व सातारा हे तीन जिल्हे जोडणारा वारणा नदीवरील मांगले- काखे पूलाचे केंद्रीय रिझर्व्ह फडातून काम सुरू आहे .बालाजी कन्स्ट्रक्शन बेळगाव यांनी गतवर्षी २२ सप्टेंबर २०२० रोजी पुलाचे काम सुरू केले. त्यावेळी सार्वजनिक बांधकाम विभागाचे अधिकारी व ठेकेदार यांनी पावसाळ्यापूर्वी काम पूर्ण करून देण्याचे आश्वासन देऊन दोन्ही तीरावरील ग्रामस्थांनी सहकार्य करण्याचे आवाहन केले त्यामुळे नियम असतानाही पर्यायी रस्ता तयार केला नाही.

ठेकेदाराने उन्हाळ्यात काम झपाट्याने केले. मात्र मांगले गावाकडील एका पिलरचे काम वारणा नदीतील पाण्यामुळे करता आले नाही. वारणा नदी दूधडी भरून असल्याने ठेकेदाराने अनेक प्रयत्न करूनही यश आले नाही. शेवटी पावसाळ्यात ७ जूनला काम ठप्प झाले ते आजपर्यंत त्यावर कोणतीही हालचाल नाही. पावसाळ्यापूर्वी आमदार डॉ विनय कोरे यांनी पुलावर प्रत्यक्ष भेट देऊन सार्वजनिक बांधकाम अधिकारी व ठेकेदार यांना दिवाळीपूर्वी काम सुरु करण्याचे आदेश दिले होते. तरिही काम सुरू न केल्याने काखे व मांगले सह परिसरातील ८-१० गावात असंतोष पसरला आहे.

गेल्या महिन्याभरापासून वारणा साखर कारखान्याचा गळीत हंगाम सुरू झाल्याने लांब, अरुंद चिकुर्डे मार्गावरून जीवघेणी वाहतूक सुरू आहे. या काळात लहान मोठे अपघात झाले असून चिकुर्डे गावात सतत वाहतुकीची कोंडी होत असल्याने अडचणी निर्माण झाल्या आहेत. मांगले व परिसरातील विद्यार्थी मोठया प्रमाणात कोल्हापूर, वारणानगर व पेठवडगाव या ठिकाणी शिक्षणासाठी येत असल्याने वेळेत पोहचत नसल्याने शैक्षणीक नुकसान सुरू आहे. कोल्हापूर व वारणानगर, एमआयडीसी मध्ये येणारे कर्मचारी व पन्हाळा व हातकणंगले तालुक्यातील नागरिक शिराळा तालुक्यात जाताना जीव मुठीत घेऊन आर्थिक भुर्दंड सोसत प्रवास करीत आहेत.

त्यामुळे शासन व ठेकेदाराने काम त्वरित सुरू करावे या मागणीसाठी मांगले ग्रामस्थ आक्रमक झाले असून येत्या ३० नोव्हेंबर पर्यन्त कामास सुरूवात झालीं नाही तर बुधवार १ डिसेंबर रोजी सकाळी ११ वाजता काम बंद असलेल्या पुलाजवळ वारणा नदीत जलसमाधी घेण्याचा इशारा मांगले गावातील शंभराहून अधिक ग्रामस्थांनी निवेदनाद्वारे दिला आहे. अशा आश्याचे निवेदन शिराळा तहसीलदार, सार्वजनिक बांधकाम विभाग व पोलीस ठाणे यांना भेटून दिले आहे.

त्यांना माझ्या घरचा दरवाजा कायमचा बंद -आमदार मानसिंगराव नाईक |The door of my house is permanently closed to them - MLA Mansingrao Naik