शिराळा:तालुक्यात सध्या होणाऱ्या सर्व यात्रा भरवू नये यासाठी जनजागृती करावी तसेच लसीकरणाचा वेग वाढवावा अश्या सूचना तहसीलदार गणेश शिंदे यांनी दिल्या.

येथील तहसीलदार कार्यालयात यात्रा रद्द करणे , लसीकरण वेग वाढवणे यासाठी सरपंच, ग्रामसेवक , तलाठी आदींच्या आयोजित बैठकीत बोलताना तहसीलदार गणेश शिंदे , गटविकास अधिकारी डॉ अनिल बागल , पोलीस निरीक्षक सुरेश चिल्लवार यांची प्रमुख उपस्थिती होती.

तहसीलदार शिंदे म्हणाले , सद्या तालुक्यात यात्रा सुरू होत आहेत. कोरोना चा वाढता प्रसार पाहता या सर्व यात्रा भरवू नयेत.तसेच ग्रामसेवक , गावकामगार तलाठी , ग्रामपंचायत पदाधिकारी यांनी या बाबत जनजागृती करावी. मुंबई आदी परगाव हुन येणाऱ्या गावकऱ्यांना गावाकडे न येण्याबद्दल विनंती करावी.

आता कोरोना प्रतिबंधक लसीकरण ही ४५ वर्षा वरील सर्वांसाठी करण्याचे सुरू झाले आहे. उपजिल्हा रुग्णालय , ग्रामीण रुग्णालय , प्राथमिक आरोग्य केंद्र , उपकेंद्रातही लसीकरण करण्यास सुरुवात केली आहे. त्यामुळे लसीकरण करण्यासाठी नागरिकांच्यामध्ये जनजागृती करून लसीकरणा चा वेग वाढवावा. ज्याठिकाणी कोरोना रुग्ण आढळून आले आहेत तेथे विलगिकरण , औषधोपचार , संपर्क याबाबत दक्षता घ्या असे सांगितले.

यावेळी नायब तहसीलदार सचिन कोकाटे , तालुका आरोग्य अधिकारी डॉ.प्रवीण पाटील , सहाय्यक गटविकास अधिकारी अरविंद माने ,मुख्याधिकारी योगेश पाटील, तालुक्यातील सरपंच , ग्रामपंचायत पदाधिकारी , ग्रामसेवक , गावकामगार तालाठी आदी उपस्थित होते.

---------