शिराळा:: येथील गुरुवार पेठेत अज्ञात चोरट्यांने घर बंद असल्याचा फायदा घेऊन २२ तोळे सोने, ८ भार चांदी व रोख पन्नास हजार असा ७ लाख ६८ हजार रुपयांच्या ऐवजावर डल्ला मारला. यामुळे शिराळा शहरात खळबळ उडाली आहे. ही घटना शनिवारी सायंकाळी ६ वाजन्याच्या सुमारास उघडकीस आली. याबाबत सौ. माया सुधीर जाधव रा. गुरुवार पेठ, यांनी पोलिसात वर्दी दिली आहे.

शिराळा पोलिसातून मिळालेली माहिती अशी की, गुरूवार पेठेत सुधीर विश्वासराव जाधव यांचे घर आहे. ते इस्लामपूर येथे खाजगी रुग्णालयात उपचारासाठी दाखल होते. आज शनिवारी सुधीर जाधव यांना दवाखान्यातुन डिस्चार्ज मिळणार होता. त्यामुळे त्यांची पत्नी माया पैसे नेण्यासाठी शुक्रवारी सायंकाळी सहाच्या दरम्यान घरी आल्या होत्या. त्यावेळी त्यांनी घर उघडले असता तिजोरी उघडी दिसली. कपाटातील दवाखान्याचे बिल भरण्यासाठी ठेवलेले रोख ५० हजार रुपये, २२ तोळे सोने ८ भार चांदी असा ७ लाख ६८ हजार रुपयांचा मुद्देमाल चोरीस गेल्याचे लक्षात आले. त्यानंतर त्यांनी याबाबत पोलिसांना माहिती दिली. त्यावेळी पोलीस उपनिरीक्षक अविनाश वाडेकर , शिवाजी पाटील , महेश साळुंखे , विनोद पाटील , रणजित ठोमके यांनी घटनास्थळी भेट देऊन पाहणी केली. आज शनिवारी सायंकाळी माया जाधव यांनी शिराळा पोलिसात फिर्याद दिली आहे. सायंकाळी सांगलीहुन श्वान पथक मागवले असता ते घरात व अंगणात घुटमळले. पुढील तपास पोलीस उपनिरीक्षक अविनाश वाडेकर करीत आहेत.

--------------