शिराळा: शासकीय नोकरी म्हटलं की बदली ही असतेच. साहेबांची बदली ही काहीजणांना आनंदाची तर काही जणांना दुःख देणारी असते. पण साहेबांच्या निरोपावेळी सर्वांच्या डोळ्यात अश्रू येणं हे क्वचितच घडतं. हे अश्रू चक्क पोलिसांच्या डोळ्यातुन येणं हे सिनेमात काल्पनिक दाखवतात पाणी आम्ही हे प्रत्यक्षात शिराळा पोलीस ठाण्यात अनुभवले. ते ही पोलीस निरीक्षक विशाल पाटील यांच्या निरोप समारंभ प्रसंगी. त्या प्रसंगाने सर्वच भावुक झाले.

शासकीय सेवेत काम करताना अधिकारी आणि कर्मचारी यांच्या सुसंवाद असेल तर त्यांचे नाते मैत्री पलीकडे जाते.तो माणूस आपला घरचा कधी झाला हेच कळतं नाही.अशा माणसाची बदली झाली की मनाला वेदना होतात. त्याच वेदना आज शिराळा पोलीस ठाण्याचे पोलीस निरीक्षक विशाल पाटील यांच्या निरोपाच्या निमित्ताने प्रत्यक्ष अनुभवता आल्या.

आज शिराळा पोलीस ठाण्यात आपापल्या कामाचा व्याप सांभाळत नव्याने शिराळा पोलीस ठाण्यात हजर होणाऱ्या पोलीस निरीक्षक सुरेश चिल्लावार यांच्या स्वागताची व पोलीस निरीक्षक विशाल पाटील यांच्या निरोपाच्या कार्यक्रमाची सर्व पोलीस बांधव तयारी करत होते. दुपारी दोन्ही साहेबांचा आदर सत्कार झाला.अन वेळ झाली पोलीस निरीक्षक विशाल पाटील यांच्या निरोपाची. सजवलेल्या गाडीत साहेबांना त्यांच्या कुटुंबीयांना समवेत बसवून ती गाडी ओढत नेत असताना आतून सर्व पोलीस बांधव व भगिनींच्या अश्रूंचा बांध फुटला. अन बाहेरून दणकट व कणखर वाटणारे पोलीस दादा ढसा ढसा रडू लागले. कारण विशाल पाटील यांच्या मनाचा कर्मचाऱ्यांशी वागण्याचा "विशाल" पणा होता. कारण त्यांनी काम करताना कामापुरता कर्मचारी इतर वेळी मैत्री जोपासून त्यांच्या मनात आपुलकीचे स्थान निर्माण केले. त्यामुळेच सर्वांच्या डोळ्यात अश्रू आले.

-----------------------------------