शिराळा: डोंगर दर्ऱ्याची कसली माहिती नसताना रोजच्या चाकोरी बद्ध जीवनाला बगल देत एक वेगळा साहसी अनुभव म्हणून सह्याद्री ट्रेक्स अँड अॅडव्हेंचर ग्रुप सांगली या संस्थेच्या सहकार्याने रविवार १४ मार्च २०२१ रोजी पहाटेच्या ३ते ६ या वेळी अंधाराची तमा न बाळगता १६४६ मीटर उंच असणाऱ्या महाराष्ट्रातील उंच शिखर कळसूबाई शिखराची अडीच ते तीन तासात वळणावळणाच्या खडतर मार्गावरून चढाई करण्याचा चित्त थरारक अनुभव शिराळा-वाळवा तालुक्यातील महिला शिक्षिकांनी घेतला.

महाराष्ट्रातील पराक्रमी स्त्रियांचा इतिहास साक्षीला घेऊन आधुनिक तंत्रज्ञानाच्या युगात जीवनातील संसाराचे ओझे दोन दिवस बाजूला ठेवून उंच कळसूबाई शिखर सर करण्याचे धाडस महिला शिक्षिकांच्या जगण्याला मोठी ऊर्जा देऊन जाते. आम्ही सुद्धा कोणत्याही परिस्थितीत सह्याद्री सारखे संकटाशी सामना करु शकतो हेच या विशेष मोहिमेतून जाणवून येते.

सह्याद्री ट्रेक्स अँड अॅडव्हेंचर ग्रुपचे वैभव बंडगर, युवराज साठे, दिलीप गोसावी यांचे मार्गदर्शनाखाली सौ. नंदिनी हवालदार व करुणा मोहिते यांच्या नियोजनानुसार कळसूबाई शिखर ट्रेकिंगचे आयोजन करण्यात आले, .सर्व महिला भगिनींच्या सहकार्याने कळसूबाई शिखर सर करण्याची मोहिम यशस्वी पार पडली. या ट्रेकिंग मध्ये ५० ते ५५ वर्षाच्या सुवर्णलता गायकवाड,सुवर्णा बच्चे,सुनिता पाटील, भारती माने,सुजाता शेटे, मीना चव्हाण या भगिनींनी स्वयंप्रेरणेने सहभाग घेतला , याशिवाय नंदिनी हवालदार, करुणा मोहिते, अंजली यादव, वर्षा शिनगारे,स्वाती देसाई,शारदा रोकडे, मनिषा कुरणे, संगीता आदाटे,विनिता गुरव,आदि महिलांनी कळसूबाई शिखर चढणेचा वेगळा अनुभव घेतला.

----------