चिखली (ता. शिराळा) येथे आज (ता. १८) विश्वासराव नाईक सहकारी साखर कारखान्याच्या अधिमंडळाची ५० वी वार्षिक सर्वसाधारण सभा ऑनलाईन पद्धतीने मोठया उत्साहात संपन्न झाली. कारखान्याचे अध्यक्ष, आमदार मानसिंगराव नाईक अध्यक्षस्थानी तर, उपाध्यक्ष माजी आमदार बाबासाहेब पाटील व सर्व संचालक मंडळ प्रमुख उपस्थित होते. स्वागत, प्रास्तविक व विषयपत्रिकेचे वाचन कार्यकारी संचालक राम पाटील यांनी केले. अनुक्रमे नऊ ठराव एकमताने मंजूर करण्यात आले. अध्यक्षीय मनोगतात आमदार नाईक म्हणाले, केंद्र शासनाने ३ हजार ५०० रुपये प्रति क्विंटल साखरेची आधारभूत किंमत करणे व बाजारपेठेत विक्री व्यवस्था करणे गरजेचे आहे. तरच उसाची आधारभूत किंमत देणे कारखान्यांना परवडणार आहे. अन्यथा कारखाने कर्ज व त्यावरील व्याजामुळे अडचणीत येतील. केंद्र शासनाने निश्चित केलेली किंमत न आल्याने साखरेची स्थानिक बाजारपेठेत विक्री झाली नाही. देशातील सर्वधिक ३२६१ रुपये अनुदानासह प्रति क्विंटल दरा प्रमाणे कारखान्याने साखर निर्यात केली आहे. निर्यातीचे हात दिल्याने कारखाना सुस्थितीत, अन्यथा अवस्था बिकट झाली असती. पुढील वर्षात उसाच्या रसापासून इथेनॉल निर्मिती व अल्कोहोल निर्मितीवर भर राहील. वाकुर्डे योजना व वारणा प्रकल्पाला सलग दोन वर्षे दोनशे, दोनशे कोटी रुपये जलसंपदा मंत्री मा. ना. जयंतराव पाटील साहेबांच्या मदतीने आले. वाकुर्डे योजना पूर्ण करणे हे लोकनेते फत्तेसिंगराव नाईक अप्पांचे स्वप्न होते. ते पूर्ण करणार आहे. यावेळी राजेंद्रसिंह नाईक, विराज नाईक, सम्राटसिंह नाईक, विवेक नाईक, सचिन पाटील यांच्यासह सर्व खातेप्रमुख उपस्थित होते. संचालक हंबीरराव पाटील यांनी आभार मानले.