शिराळा : कोरोनाचा वाढता प्रसार रोखण्यासाठी सार्वजनिक ठिकाणी गर्दी होणार नाही याची काळजी घ्यावी व शाळा, महाविद्यालये पंधरा दिवसांसाठी बंद ठेवता येतील का यासंबंधी प्रशासनाशी चर्चा करून निर्णय घ्यावा, असे मत आमदार मानसिंगराव नाईक यांनी व्यक्त केले.

वाढत्या कोरोनाच्या पार्श्वभूमीवर शिराळा तहसील कार्यालयात त्यांच्या अध्यक्षतेखाली आढावा व उपाय योजनांबाबत बैठक झाली. त्यावेळी ते बोलत होते. तहसीलदार गणेश शिंदे प्रमुख उपस्थितीत होते.

आमदार नाईक म्हणाले, बाजार पूर्णपणे बंद न ठेवता शहरातील वेगळ्या ठिकाणी सामाजिक अंतर राखून बसण्याची व्यवस्था करावी. आरोग्य विभागाने पुरेसा औषधसाठा उपलब्ध करून ठेवावा, शिराळा उप जिल्हा रुग्णालय व कोकरूड ग्रामीण रुग्णालय येथील ऑक्सिजन टाक्या भरून ठेवाव्यात. बेड व्यवस्था करून घ्यावी. तालुक्यातील लसीकरणाचा त्यांनी यावेळी आढावा घेतला व लसीकरणाचा वेग वाढवावा. एसटी बस सेवा सुरू ठेवत असताना, पुरेशी काळजी घेऊन विना मास्क कोणालाही बस मध्ये प्रवेश देऊ नये, शिवाय गर्दीवर नियंत्रणसाठी बसस्थानक परिसरात पोलीस कर्मचारी तैनात करावेत. कोरोनाचा वाढता प्रसार रोखण्यासाठी प्रत्येक यंत्रणेने आपापली जबाबदारी चोख पार पाडावी. आदी सूचना त्यांनी बैठकीत दिल्या.

या बैठकीस गट विकास अधिकारी डॉ. अनिल बागल, तालुका आरोग्य अधिकारी डॉ. प्रविण पाटील, उप जिल्हा रुग्णालयाचे वैद्यकीय अधीक्षक जमाल मोमीन, शिराळा नगरपंचायतचे मुख्य कार्यकारी अधिकारी योगेश पाटील, पोलीस निरीक्षक सुरेश चिल्लावार, सहाय्यक पोलीस निरीक्षक ज्ञानदेव वाघ, शिराळा आगार प्रमुख विद्याताई कदम, उप अभियंता अतुल केकरे, कोकरूड ग्रामीण रुग्णालयाच्या डॉ. इनामदार, गट शिक्षण अधिकारी प्रदीप कुडाळकर, नायब तहसीलदार सचिन कोकाटे आदी उपस्थित होते.

-----------------