शिराळा मध्ये जैवविविधता दृष्ट्या महत्त्वाचे असे Small-Indian Civet ( _Viverricula indica_) म्हणजेच तपकिरी रंगाच्या शरीरावर काळे ठिपके व पट्टे असणारे उदमांजर वाचवण्यात यश आले आहे.

शिराळ्यातील मोरणा धरण नजीक कदमवाडी या ठिकाणी हे उदमांजर सचिन कदम यांना जखमी अवस्थेत अढळले. शिराळ्यातील पर्यावरण सनवर्धनासाठी काम करणाऱ्या प्लॅनेट अर्थ फाउंडेशन च्या वन्यजीव आपत्कालीन सेवा च्या रेस्क्यु टीम मार्फत हे उदमांजर वाचण्यात आले. वनविभाग आणि पशुवैद्यकीय अधिकारी यांच्या मार्गदर्शनानुसार त्यावर उपचार सुरू आहेत. जंगल, माळरान तसेच ऊस शेती अशा ठिकाणी या उदमांजराचा निवास असतो. लहान मांसभक्षक प्राणी म्हणून निसर्गामध्ये त्याची भूमिका फार महत्त्वाची आहे. उदमांजराचे उंदीर, साप, सरडे, पाली हे प्रमुख अन्न आहे परंतु काहीवेळेस ते जंगली फळे व झाडांची मुळे देखील खातात. झाडांच्या बिया विष्टेतून आहे तश्या बाहेर पडतात व त्यांचा जंगलात प्रसार होतो. झाडांच्या बिया रुजून जंगल वाढीस मदत होते. हा प्राणी पर्यावरण दृष्ट्या फार महत्त्वाचा आणि शांत असल्यामुळे लोकांना जखमी अवस्थेत दिसल्यास वनविभागाला फोन करावा असे आवाहन वनक्षेत्रपाल सुशांत काळे यांनी केले आहे. या उदमांजराला वाचवताना संस्थेचे उपाध्यक्ष प्रणव महाजन, वन्यजीव आपत्कालीन सेवेचे प्रमुख प्रा. सुशील कुमार गायकवाड, राज पाटील, रणजित सातपुते आणि इतर टीम उपस्थित होती.

-----------------------------------------------------------------