शिराळा,ता.५:जिल्हा परिषद शाळांच्या शाळा व्यवस्थापन समित्या कार्यक्षम झाल्या तर शिक्षणात आमुलाग्र बदल होईल. शिक्षणातील बदलासाठीच शिराळा तालुक्यातील शाळा शंभर टक्के डिजिटल करण्याचा मानस आहे. त्यासाठी सर्व शाळा व शिक्षकांनी सहकार्य करावे असे आवाहन शिराळा पंचायत समितीचे उपसभापती बाळासाहेब नायकवडी यांनी केले.

आरळा( ता. शिराळा ) येथील सिद्धार्थनगर जिल्हा परिषदेच्या शाळेतील शाळाबाह्य मुलांचे सर्वेक्षण कार्यक्रमात बोलत होते. यावेळी नायकवडी म्हणाले, समाजाच्या सहकार्याने व कार्यक्षम शिक्षक यामुळे शाळांचे रूपडे पालटत आहे.शिक्षकांची कल्पकता आणि समाजाचे सहकार्य असले की शाळा नावारूपाला येते हे सिद्धार्थनगर शाळेतील शिक्षकांनी दाखवून दिले आहे.

यावेळी गटशिक्षण अधिकारी प्रदीपकुमार कुडाळकर म्हणाले ,शालेय वातावरण उत्तम, मुलांना शाळेबद्दल प्रेम व आपुलकी निर्माण झाल्यास दर्जेदार विध्यार्थी घडतील. मोहन पवार व लताराणी खबाले या शिक्षकांनी आपल्या कामातून शाळेचा लोकसहभागातून कायापालट करून एक आदर्श निर्माण केला आहे.

यावेळी प्रभारी शिक्षणविस्तार अधिकारी आलिशा मुलाणी केंद्रप्रमुख मधुवंती धर्माधिकारी यांनी आपले मनोगत व्यक्त केले. यावेळी साखर कारखाना परिसरातील ऊसतोड कामगारांच्या झोपड्यांना भेट देऊन तेथील सर्व्हेची पडताळणी केली. यावेळी शाळेच्यावतीने उपसभापती बाळासाहेब नायकवडी यांचा शाळा व्यवस्थापन समितीच्या वतीने सत्कार करण्यात आला.उत्क्रुष्ट कामाबद्दल गटशिक्षणाधिकारी प्रदिप कुमार कुडाळकर ,वि.अ आलिशा मुलाणी, केंद्रप्रमुख मधुवंती धर्माधिकारी यांचाही सत्कार करण्यात आला.लॉकडाऊनच्या काळात विविध स्पर्धेत राष्ट्रीय,राज्य,जिल्हा व तालुकास्तरावर यश संपादन केलेल्या विद्यार्थ्यांचा सत्कार करण्यात आला.यावेळी शाळेचे रंगकाम डिजीटल वर्गखोली,बोलक्या पताका नियोजन बद्ध सुविचार लेखन,बाहेरून शाळा परिसर सुंदर व बोलक्या भिंती पाहून सर्वांनीच शाळेचे भरभरून कौतुक केले. यावेळी ,सी..एम.पाटील ,जितेंद्र परदेशी ,पुनम मसुटगे ,शुभांगी भोसले ग्रामपंचायत सदस्या जया कांबळे,माजी उपसरपंच वसंत पाटील,शाळा व्यवस्थापनच्या अध्यक्षा नेत्रा झाडे,अशोक झाडे, जगन्नाथ झाडे,तातोबा कांबळे उपस्थित होते.