सागाव - शिक्षक नेते संजय दिवे यांची पार्लमेंटरी बोर्डाच्या कार्याध्यक्ष पदी निवड झालेबद्दल सत्कार करताना जिल्हाध्यक्ष विनायक शिंदे , तानाजी खोत , फत्तेसिंग पाटील इ.

शिराळा: खंद्या समर्थकांची साथ आणि सामान्य शिक्षकांच्या पाठबळाच्या जोरावर शिक्षक बँक निवडणुकीत सत्ताधाऱ्यांना चितपट करणार ' असा विश्वास शिक्षक संघाचे जिल्हाध्यक्ष विनायक शिंदे यांनी व्यक्त केला.

सागाव ता शिराळा येथील शिक्षक नेते संजय दिवे यांची पार्लमेंटरी बोर्डाच्या कार्याध्यक्ष पदी निवड झालेबद्दल आयोजित शिक्षक संघाच्या सत्कार समारंभात बोलत होते. सरचिटणीस अविनाश गुरव , पार्लमेंटरी बोर्डाचे नेते अरुण पाटील , पुणे विभागीय अध्यक्ष तानाजी खोत , रफिक अत्तार प्रमुख उपस्थित होते.

जिल्हाध्यक्ष विनायक शिंदे म्हणाले , " शिक्षक बँकेत भ्रष्टाचाराचा कळस झाला आहे . संगणक दुरुस्ती , मयत फंड , स्टेशनरी यासारख्या शिर्षकावर बेसुमार खर्च करून स्वतःचे खिसे भरण्याचे काम सत्ताधारी शिक्षक समितीने केले आहे . गेल्या अकरा वर्षात एकही सभासद हिताचे काम सत्ताधाऱ्यांकडून झाले नाही. कोरोना मुळे मिळालेले बोनस एक वर्ष सुद्धा करंट्या सत्ताधाऱ्यांनी वाया घालविले.

पुणे विभागीय अध्यक्ष तानाजी खोत म्हणाले , ' सत्ताधाऱ्यांकडून निवडणुकीच्या तोंडावर व्याजदर कमी करून सभासदांच्या तोंडाला पाने पुसण्याचा प्रयत्न नाकारता येत नाही. सुज्ञ सभासद बळी पडणार नाहीत. सत्ताधाऱ्यांचे सध्याचे सभासद प्रेम हे बेगडी आहे.

पार्लमेंटरी बोर्डाचे नवनिर्वाचित कार्याध्यक्ष संजय दिवे म्हणाले , ' शिक्षक बँकेत सत्ताधाऱ्यांचे दाखवायचे दात आणि खायचे दात वेगळे आहेत. यावेळी सभासद भ्रष्ट सत्ताधाऱ्यांचे दात घशात घातल्याशिवाय राहणार नाहीत.

यावेळी सरचिटणीस अविनाश गुरव , रफिक अत्तार यांनी मनोगत व्यक्त केले. तर संजय दिवे यांची पार्लमेंटरी बोर्डाच्या कार्याध्यक्ष पदी निवड झाल्याबद्दल जागी सत्कार करण्यात आला.

कार्यक्रमाला जिल्हा कार्यकारी अध्यक्ष फत्तेसिंग पाटील , तालुकाध्यक्ष अशोक घागरे , जिल्हा उपाध्यक्ष प्रकाश जाधव, तालुका नेते संजय पाटील , निवृत्ती साळुंखे, विभागीय अध्यक्ष इंनुस मनेर , सल्लागार केशव पवार , उपाध्यक्ष गणेश लोनिष्टे , कृष्णा तेरवे यांच्यासह परिसरातील शिक्षक मोठ्या संख्येने उपस्थित होते. तालुका सरचिटणीस मोहन पवार यांनी आभार मानले.

अब की बार , सेवानिवृत्त हद्दपार - शिक्षक बँकेत सेवानिवृत्त नेत्यांच्या हस्तक्षेपाला सेवेतील शिक्षक सभासद कंटाळला आहे . सेवेतील शिक्षकांनी मोठी केलेली ही बँक सेवेतील शिक्षकांनीच चालवावी अशी अपेक्षा सामान्य शिक्षकांची आहे. सामान्य शिक्षक सभासदांच्या जोरावर यावेळी सेवानिवृत्त शिक्षक नेत्यांची लुडबुड कायमची थांबविणार.
जिल्हाध्यक्ष विनायक शिंदे.

----------------------------------