शिराळा: सागाव फाटा ते नाटोली दरम्यान वारणा डाव्या कालव्याचे चालू असलेले खुदाईचे काम येथील शेतकऱ्यांना कालव्यात गेलेल्या जमिनीचा योग्य मोबदला न मिळाल्याने काम बंद पडून जो पर्यंत मोबदला मिळत नाही तो पर्यंत काम बंद ठेवण्याचा इशाला दिला.

सन २०१० च्या दरम्यान येथील शेतकऱ्यांच्या वारणा कालवा प्रकल्पाच्या कामात गेलेल्या जमिनीसाठी ८१० रु.प्रतिगुंठा अशा दराने शेतकऱ्यांना त्यांच्या जमिनीचा मोबदला जाहीर केला होता. संबंधित शेतकऱ्यांच्या नावे आला होता.परंतु योग्य मोबदला नसल्याने काही शेतकऱ्यांनी तो स्वीकारला नाही.त्यानंतर सन २०२० पर्यंत १० वर्षे सदर कालव्यांची कामे बंदच होती. गेल्या महिनाभरापासून सदर कामे सुरू झाली आहेत.बहुतांशी शेतकऱ्यांच्या जमिनी गेल्या दहा वर्षापूर्वीच शेतकऱ्यांना विचारात न घेता शासनाच्या नावे लागल्या असल्याची काही शेतकऱ्यांनी माहिती दिली. बहुतांशी शेतकऱ्यांच्या उभ्या पिकांमध्ये वाहने चालवत, शेतकऱ्यांच्या पिकांची नासधूस करीत नुकसान केले असल्याच्या संतप्त भावनेतून येथील शेतकऱ्यांनी, महिलांनी संघटित होत चालू असणाऱ्या कामाच्या ठिकाणी आंदोलन करीत ठिय्या मांडून काम बंद पाडले.

यावेळी माजी मंत्री शिवाजीराव नाईक,सत्यजित देशमुख, भाजपाचे तालुकाध्यक्ष सुखदेव पाटील,यांनी आंदोलन स्थळी भेट देत शेतकऱ्यांना पाठिंबा दर्शविला.

यावेळी माजी मंत्री शिवाजीराव नाईक यांनी शासनाच्या नवीन धोरणानुसार शेतकऱ्यांना त्यांच्या जमिनीचा मोबदला मिळत नाही.तोपर्यंत काम बंद ठेवण्याच्या सूचना संबंधित ठेकेदाराला दिल्या. यावेळी सुखदेव पाटील यांनी आपले मनोगत व्यक्त केले.

शेतकऱ्यांना जमिनीचा अल्प मोबदला हे शेतकऱ्यांच्या तोंडाला पाने पुसण्याचा प्रकार आहे.जोपर्यंत योग्य निर्णय होत नाही.तोपर्यंत आम्ही शेतकऱ्यांच्या पाठिशी ठाम उभा राहू असे आश्वासन सत्यजित देशमुख यांनी दिले.

आंदोलनस्थळी तहसिलदार गणेश शिंदे, उपअभियंता अनिल लांडगे यांनी भेटी देत शेतकऱ्यांचे म्हणणे जाणून घेतले. तहसिलदार गणेश शिंदे यांनी सदर विषय भूसंपादन विषयक सर्व रेकाॕर्डस तपासून,सखोल माहिती घेऊन,प्रांताधिकारी यांच्या समवेत मंगळवार (दि.९ मार्च) रोजी तातडीची बैठक आयोजित करून याबाबत योग्य तो तोडगा काढला जाईल.असे शेतकऱ्यांना आश्वासन दिल्यानंतर आंदोलन स्थगित करण्यात आले.

यावेळी बाबासो नाकील,बाबासो पाटील ,तानाजी पाटील,तानाजी निंबाळकर, बबन पाटील, अजित पाटील,काशीनाथ पाटील यांच्यासह शेतकरी व महिलाउपस्थित होते.