शिराळा,ता.८: मार्च अखेर असंल्याने बँका व पतसंस्थांनी महिलांच्याकडे कर्ज वसुलीसाठी तगादा लावला आहे. ही कर्ज वसुली थांबवून कोरोनाच्या काळात आलेली वाढीव बिले कमी करावीत अथवा माफ करावीत अशी मागणी भाजपच्या महिला आघाडीच्या सांगली जिल्हा उपाध्यक्षा विद्याताई पाटील यांनी तहसीलदार गणेश शिंदे यांच्याकडे निवेदनाद्वारे केली आहे . अन्यथा तहसीलदार कार्यालयासमोर उपोषण करण्याचा इशाला दिला आहे.

या निवेदनात म्हटले आहे की कोरोनाच्या काळात लॉक डाऊन होता. त्याचा परिणाम सर्वच महिलांच्या छोटे-मोठे उद्योग व्यवसायावर झाला. अजून ही या व्यवसायातून महिला सावरू शकलेल्या नाहीत. छोटे-मोठे उद्योग व्यवसाय उभारणीसाठी महिलांनी पत संस्था व बँकाकडून कर्ज घेतले आहे.त्या कर्जाचे हप्ते भरण्यासाठी सध्या पतसंस्था, बँकांनी तगादा लावला आहे .व्यवसायच नाही तर कर्ज कशी फेडायची हा प्रश्न महिलांना पडला आहे. त्यामुळे बँका व पतसंस्था ची वसुली थांबवावी महिलांना सावरण्यास मदत करावी. कोरोनाच्या काळात घरगुती वीज बिल वाढून आली आहेत. दोनशे ते अडीचशे रुपये येणारी बिले हजारावर आली आहेत.तरी या बिलांची शहानिशा करून बिले कमी करावीत अथवा माफ करावीत. अन्यथा तहसीलदार कार्यालयासमोर उपोषण करण्यात येईल.

यावेळी भाजपाच्या सांगली जिल्हा महिला आघाडीच्या उपाध्यक्षा विद्याताई पाटील, डॉ जयश्री पाटील ,संजिवनी पाटील ,लता पाटील ,शुभांगी पाटील ,माधुरी पाटील आशा जाधव, वनीता जाधव ,सावित्री गराडे ,सुनिता कांबळे आश्वीनी कांबळे उपस्थित होत्या.

-------------------------------------------------------------