शिराळा: शिरसटवाडी (ता शिराळा) येथील राजाराम पांडुरंग शिरसट (वय ७५) या वयोवृद्ध शेतकऱ्याचा शेता जवळ आलेली आग विझवताना त्यातच होरपळून मृत्यू झाला.

ही घटना आज दुपारी १ च्या सुमारास घडली. याबाबत पुतण्या मधुकर शिरसट यांनी कोकरूड पोलिसात फिर्याद दिली आहे.

पोलिस व घटनास्थळावरून मिळालेली माहिती अशी की, राजाराम शिरसट यांची वाघाचा डोंगर परिसरातील आंब्याचा ओहोळ परिसरात एक एकर शेती असून या ठिकाणी हे आपल्या पिकाची राखण करायला रोजच्या प्रमाणे सकाळी १०.३० च्या सुमारास गेले होते. दुपारी १२.३० च्या सुमारास शेताच्या शेजारी पालापाचोळा पेटला होता. ती आग शेजारी असणाऱ्या पिकाकडे ,खोपीकडे व बांबूच्या बेट व आंब्याच्या झाडाकडे येऊ नये म्हणून ती विझवत असताना त्यांचा पाय घसरल्याने तोल जाऊन ते आगीत पडले. उन्हामुळे व वाऱ्याच्या झोतामुळे आग चोहोबाजूंनी पसरली व या आगीत त्यांना ९० टक्के पेक्षा जास्त भाजल्याने होरपळून मृत्यू झाला.

गावातील लोकांना घटनास्थळी भेट दिली असता ते मृतवस्थे आढळून आले. अधिक तपास पोलीस नाईक शिवाजी जाधव करत आहेत.त्यांच्या पश्चयात पत्नी,मुलगा,मुलगी, सुना, नातवंडे असा परिवार आहे. कोकरूड ग्रामीण रुग्णालयात शवविच्छेदन करून रात्री उशिरा अंत्यसंस्कार करण्यात आले.

जेवणामुळे कळलं
त्यांचा नातू सुनील हा दुपारी राजाराम यांचे जेवण घेऊन शेतात गेला. त्यावेळी आजोबा खोपीत दिसले नाहीत.म्हणून त्याने आग लागलेल्या ठिकाणी पाहिले असता भाजलेल्या अवस्थेत आढळून आले.त्याने ही माहिती घरी सांगितली. तो जेवण घेऊन गेला नसता तर लवकर कळतेच नसते.

------------------------------------