शिराळा,ता.२५: तालुक्यामध्ये गेल्या सहा -सात महिन्यापासून बिबट्याचा वावर मोठ्या प्रमाणात वाढला आहे. पशु,पक्षी यासह मनुष्यावर देखील हल्ले होऊ लागले आहे.ही परिस्थिती भयंकर व भीतीदायक असून नागरिकांच्या मध्ये भितीचे वातावरण पसरले आहे. त्यामूळे बिबट्यांचा बंदोबस्त करून नुकसान भरपाई द्यावी अशी मागणी जिल्हा परिषद माजी उपाध्यक्ष सत्यजित देशमुख यांनी केली आहे.

यावेळी देशमुख म्हणाले, उत्तर विभाग, पश्चिम व दक्षिण विभागामध्ये सातत्याने बिबट्याचा वावर होत असल्याचे लोकांच्या निदर्शनास येत आहे. अनेक वेळा लोकांना शेतामध्ये बिबट्या दिसल्याचे आढळून आलेले आहे. तालुक्यातील वाकुर्डे बुद्रुक, वाकुर्डे खुर्द, शिरशी, अंत्री खुर्द,अंत्री बुद्रुक या ठिकाणी बिबट्याने शेतकऱ्यांच्या पाळीव जनावरांवर हल्ला केला.त्याचबरोबर शेळी, मेंढी, कोंबड्या अशा जनावरावर वारंवार हल्ला करून शेतकऱ्यांचे प्रचंड नुकसान केलेले आहे. तडवळे येथील एका ऊस तोडणी मजुरी करणाऱ्या कुटुंबातील बालकावर हल्ला केला यामध्ये त्या बालकाचा दुर्दैवी मृत्यू झाला. तडवळे, उपवळे तील काही शेतकऱ्यांच्या जनावरांच्या वस्तीमध्ये शिरून बिबट्याने लहान-मोठे जनावरांवर हल्ला केलेला आहे. मागील तीन -चार दिवसांपासून कणदूर, पुनवत, खवरेवाडी, ढोलेवाडी या विभागात बिबट्यांचा प्रचंड वावर असून शेळ्या,मेंढ्या व कुत्रे यांच्यावर हल्ले झाले आहेतत. वन विभागाने ही बाब गाभिर्याने घेवून बिबट्याचा बंदोबस्त तात्काळ करावा. तसेच ज्या शेतकऱ्यांची पशुपक्षी, पाळीव जनावरे यांची हनी झाली आहे.त्यांना त्याची नुकसान भरपाई तात्काळ देण्यात यावी.

-----------------