शिराळा येथे रस्ते सुरक्षा सप्ताह निमित्त आयोजित कार्यक्रमात बोलताना सहायक पोलिस निरीक्षक विशाल पाटील सोबत सर्जेराव सूर्यवंशी, सुहास माळी, अनंत खोचरे, हंबीरराव देशमुख, साधना पाटील,कल्पना गायकवाड, अनंत सपकाळ

शिराळा,ता.८:मोबाईलच्या अतिवापराने नवयुवकांची वाटचाल गुन्हेगारीकडे चालली आहे. त्यामुळे मोबाईलचा सकारात्मक वापर करणे गरजेचे आहे. असे प्रतिपादन शिराळा पोलीस ठाण्याचे सहाय्यक पोलीस निरीक्षक विशाल पाटील यांनी केले.

येथील विश्वासराव नाईक महाविद्यालयात शिवछत्रपती विद्यालय आणि विश्वासराव नाईक महाविद्यालय यांच्या संयुक्त विद्यमाने अखिल भारतीय ग्राहक पंचायतीच्यावतीने रास्ता सुरक्षा सप्ताहा निमित्त आयोजित केलेल्या कार्यक्रमात बोलत होते.

साधना पाटील म्हणाल्या, सध्या मोबाईलचा अतिवापर हे सर्वात गंभीर व्यसन झाले आहे. विद्यार्थ्यांनी कमीत कमी मोबाईलचा वापर करावा.

अ. भा. ग्राहक पंचायतचे सांगली जिल्हा संघटक सुहास माळी म्हणाले, फसू नका आणि फसवू नका. प्रत्येकजण हा ग्राहक असतो. त्यामुळे सर्वांनी आपली फसवणूक होऊ नये म्हणून जागरूक असले पाहिजे.

ग्राहक पंचायतचे जिल्हाध्यक्ष सर्जेराव सूर्यवंशी म्हणाले, ग्राहकाने समस्या सोडवण्यासाठी योग्य पर्यायांचा वापर करावा. सार्वजनिक मालमत्तेचे नुकसान न करता आपल्याला आपल्या मागण्या ग्राहक पंचायतीमार्फत सोडवता येतात. माहिती अधिकार कायद्याचा वापर शस्त्र नव्हे ,तर अस्त्रासारखा करायला पाहिजे.

स्वागत व प्रास्ताविक अनंत सपकाळ यांनी केले.

यावेळी प्रा. प्रशांत पाटील, अ. भा. ग्राहक पंचायतचे सांगली जिल्हा प्रसिद्धी प्रमुख अनंत खोसरे, हंबीरराव देशमुख ,आनंद सपकाळ, शिवाजीराव चौगुले ,साधना पाटील, कल्पना गायकवाड ,पवन यावतकर, प्रताप माळी उपस्थिती होते. या कार्यक्रमासाठी शिवछत्रपती विद्यालयाचे प्राचार्य विठ्ठल नलवडे आणि विश्वासराव नाईक महाविद्यालयाच्या प्राचार्या डॉ. उज्ज्वला पाटील यांचे सहकार्य लाभले.