कुसाईवाडी (शिराळा) येथे कुसाईमाता पाणी योजनेच्या कामाचा कुदळ मारून शुभारंभ करताना आमदार मानसिंगराव नाईक. शेजारी उपस्थित मान्यवर.

शिराळा : कुसाईमाता पाणी योजनेमुळे पाण्यापासून वंचित जमिनीला पाणी मिळून शेती बारमाही पिकेल व त्यामाध्यमातून येथील शेतकऱ्यांचे राहणीमान, आर्थिक स्तर उंचावेल, असे प्रतिपादन आमदार मानसिंगराव नाईक यांनी केले.

कुसाईवाडी (शिराळा) येथे विश्वासराव नाईक कारखाण्यामार्फत होणाऱ्या कुसाईमाता पाणी योजनेच्या कामाचा शुभारंभ प्रसंगी ते बोलत होते. फत्तेसिंगराव नाईक दूध संघाचे अध्यक्ष अमरसिंग नाईक प्रमुख उपस्थित होते.

आमदार नाईक म्हणाले, कारखाण्यामार्फत शिराळा व शाहूवाडी तालुक्यात अनेक पाणी योजना राबवून हजारो हेक्टर शेतजमीन पाण्याखाली आणली आहे. शेतीसाठी पाणी ही मूलभूत गरज आहे. ही गरज ओळखुन दुरंदेवाडी, कुसाईवाडी, हुंबरवाडी, पन्हाळकरवाडी या गावांसाठी कुसाईमाता पाणी पुरवठा योजना उभारणीचे काम आज सुरू झाले आहे. त्यासाठी तीन कोटी रुपये खर्च येणार आहे. योजना पूर्ण झाल्यावर दोनशे एकर क्षेत्र बारमाही ओलिताखाली येणार आहे. त्यामुळे येथील शेतकऱ्यांचे आर्थिक स्तर व जीवनमान उंचावेल.

ते म्हणाले, अशीच परिस्थिती तालुक्याच्या उत्तर भागाची आहार. म्हणून वाकुर्डे योजना पूर्ण करण्यासाठी मी आग्रही आहे. योजनेचे पाणी उत्तर विभागात आणले असून कालवे, पोट कालवे आदींच्या माध्यमातून पाणी प्रत्येकाच्या बांधापर्यंत पोहोचविण्याचे येत्या काळात होईल. शेतीसाठी पाणी आणि बेरोजगारांच्या हाताला काम हा मूलमंत्र घेऊन मी सार्वजनिक विकासात पुढे आहे. विश्वास व विराज उद्योग समूहाच्या माध्यमातून त्यासाठी सातत्याने प्रयत्नशील आहे. मतदार संघातील जनतेने माझ्यावर दाखवलेला विश्वास सार्थ ठरवणार आहे.

प्रारंभी स्वागत उपसरपंच भास्कर पवार यांनी केले. प्रास्ताविक अविनाश पवार याने केले. युवा नेते विराज नाईक, पी. आर. पोतदार, बाबासाहेब परीट, सोसायटी अध्यक्ष भीमराव पवार यांची भाषणे झाली.

दूध संघाचे उपाध्यक्ष प्रकाश धस, माजी सभापती, सदस्य सम्राटसिंग नाईक, युवा नेते विराज नाईक, विश्वासचे संचालक विष्णू पाटील, कार्यकारी संचालक राम पाटील, पी. आर. पोतदार, सरपंच विनोद पन्हाळकर, शेतकरी संघटनेचे देवेन्द्र धस, दुरंदेवाडीचे सरपंच गोविंद दळवी, दिलीप भोगावकर, आनंदा शिराळकर, नामदेव, दिनकर साळुंखे, अमोल यमगर, पाणी संस्था अध्यक्ष निलेश काटके, दिनकर महिंद, अविनाश पवार, आनंदा भुरके, रामचंद्र मुदगे, शंकर दळवी, शिवाजी खोत, कृष्णा खोत, आदी मान्यवर व शेतकरी उपस्थित होते. आभार धोंडीराम पवारयानी मानले.