समाजसेवेचे व्रत घेऊन जगणारे स्व .वसंतराव नाईक यांचा आदर्श प्रेरणादायी-खासदार धैर्यशील माने

Shiv News October 08, 2020

शिराळा,ता.८: समाजसेवेचे व्रत घेऊन जगणारे स्व माजी आमदार वसंतराव नाईक ( बाबा ) यांचा आदर्श हा प्रेरणादायी आहे. त्याच वाटेने त्यांची पुढील पिढी वाटचाल करीत असून त्यांनी उभी केलेली संस्था ही समाज घडविणारा कारखाना आहे असे प्रतिपादन खासदार धैर्यशील माने यांनी केले.

कै. माजी आमदार वसंतराव नाईक (बाबा ) स्मृती प्रतिष्ठान शिराळा यांच्यावतीने आयोजित कै.वसंतराव नाईक यांच्या जयंतीनिमित्त आयोजित कार्यक्रमात श्री शिव छत्रपती विद्यालयात बोलत होते. यावेळी प्रमुख पाहुणे म्हणून केंद्रीय पोलीस आयुक्त विक्रम पाटील उपस्थिती होते.अध्यक्षस्थानी माजी सभापती उदयसिंह नाईक होते.

यावेळी खासदार माने म्हणाले, कै.वसंतराव नाईक यांनी ग्रामीण भागात शिक्षणाची गंगा उभी करून अनेक विद्यार्थी घडवण्याचे काम केले आहे. एका छोट्याशा वाड्यातून उभी केलेली संस्था आज वटवृक्ष सारखी खंबीरपणे उभी आहे. वैचारिकता आणि नैतिकतेचे सामर्थ्य या संस्थेमधून उभे राहिले आहे.कै. वसंतराव नाईक यांचा आदर्श घेऊन संस्था अधिक प्रगतीपथावर कशी नेता येईल याचा दूरदृष्टी कोण संस्था आणि संस्थेतील कर्मचारी यांनी बाळगावा असे आवाहन त्यांनी केले.

यावेळी खासदार माने यांच्या हस्ते संजय मारुती पाटील व भीमराव शामराव पाटील यांना जीवनगौरव पुरस्कार देऊन गौरविण्यात आले. प्रा. डॉ. मिलिंद साळवे, प्रा. प्रदीप ज्ञानदेव कांबळे, श्री मानसिंग रामचंद्र शिंदे, रेखा अर्जुन कांबळे सौ सविता कदम यांना गुणवंत शिक्षक व गुणवंत सेवक पुरस्काराने सन्मानित करण्यात आले.

केंद्रीय पोलीस आयुक्त विक्रम पाटील यांनी प्रमुख पाहुणे म्हणून आपले मनोगत व्यक्त केले. माझ्या जडणघडणीमध्ये या संस्थेचा मोलाचा वाटा असल्याने आज आपण या ठिकाणी आवर्जून उपस्थित असल्याचे पाटील यांनी सांगितले. या संस्थेतील शिक्षकांमध्ये विद्यार्थी घडवण्याचा ध्यास असल्यामुळेच माझ्यासारखा ग्रामीण भागातील विद्यार्थी केंद्रीय पोलीस आयुक्त पदापर्यंत पोहोचू शकला. यामध्ये कै. वसंतराव नाईक यांचे आशीर्वाद मोलाचे आहेत. या तालुक्यातील विद्यार्थ्यांसाठी व समाजासाठी माझ्याकडून जे काही करता येईल ते करण्यास मी कटिबद्ध आहे, असे आश्वासन त्यांनी दिले. इन्कम टॅक्स आयुक्त अभिनय कुंभार स्वतः उपस्थित न राहू शकल्यामुळे त्यांनी ध्वनिफिती द्वारे आपले मनोगत व्यक्त केले.

जीवनगौरव पुरस्काराला उत्तर देताना श्री शिवछत्रपती विद्यालयात शिराळा येथील शिक्षक संजय मारुती पाटील यांनी आपण संस्थेसाठी काम करत असताना माजी विद्यार्थ्यांनी केलेल्या सहकार्य याविषयीची भूमिका विशद केली. संस्थेसाठी काम करत असताना इन्कम टॅक्स विभागाचे आयुक्त अभिनय कुंभार यांनी व माजी विद्यार्थी यांनी केलेले सहकार्य याविषयी ऋण व्यक्त केले.

कार्यक्रमाच्या सुरुवातीला प्रमुख अतिथी व संस्थेच्या विविध शाखांचे पदाधिकारी यांच्याकडून वसंतराव नाईक बाबा यांच्या प्रतिमेचे पूजन करण्यात आले.स्व वसंतराव नाईक बाबा व्यासपीठ उद्घाटन करण्यात आले.

श्री शिवछत्रपती विद्यालयात डीजीटल क्लास रूम चे उद्घाटन खासदार धैर्यशील माने व विक्रम पाटील यांच्या हस्ते करण्यात आले. यावेळी माजी सभापती उदयसिंह नाईक, विश्वास कारखान्याचे संचालक रणजीतसिंह नाईक, प. पू. स्वामी विवेकानंद सेवाश्रम संस्थेचे सचिव विश्वप्रतापसिंग नाईक, संचालक पृथ्वीसिंग नाईक, राजेंद्र नाईक, श्रीमती कल्पना कुंभार, सनी पाटील, दुर्गा नाईक, नम्रता नाईक, संचालक जगन्नाथ बाऊचकर, मुख्याध्यापक विठ्ठल नलवडे, नगरसेविका सुनिता निकम ,नगरसेवक प्रतिभा पवार .

प्रास्ताविक उपाध्यक्ष अशोक कुंभार यांनी सुत्रसंचलन एस एस नलवडे व बाजीराव पवळ यांनी केले तर उपस्थितांचे आभार प्रा. डॉ.तानाजी हवलदार यांनी मानले.या प्राचार्य डॉ उव्जला पाटील संस्थेचे संचालक विविध शाखांमधील मुख्याध्यापक शिक्षक शिक्षकेतर कर्मचारी ग्रामस्थ उपस्थित होते.