विराज ग्रुप ऑफ इंडस्ट्रीज चे संचालक व शिराळा तालुक्याचे युवा नेतृत्व म्हणून उद्योन्मुख होत असणाऱ्या विराज दादा नाईक यांच्या कार्यकर्तृत्वाचा ठसा शिराळा विधानसभा मतदारसंघात उमटू लागला आहे. तालुक्याच्या औद्योगीकरणातील, समाजकारणातील व राजकारणातील सजग, सुलभ, विश्वासू, प्रेरणादायी युवा नेतृत्वाचा आज वाढदिवस आज होत आहे. त्या निमित्ताने त्यांच्या कार्याचा हा घेतलेला आढावा.......

उच्चविद्याविभूषित असणारे विराज दादा हे नेहमीच नवनवीन औद्योगिक, सामाजिक ज्ञान अवगत करण्याकरिता अग्रेसर रहात असणारे अभ्यासू व्यक्तिमत्व आहे. त्यांचे हे व्यक्तिमत्व एकंदरितच युवावर्गाला प्रेरणादायी ठरणारे आहे. शांत,संयमी व क्रियाशील वागणुकीमुळे त्यांची प्रतिमा दिवसेंदिवस शिराळा नाग भूमीतील जनमाणसात आपलेपणाचे स्थान निर्माण करू लागली आहे.

विराज दादा यांनी विश्वकर्मा इन्स्टिट्यूट ऑफ टेक्नॉलॉजी पुणे येथून मेकॅनिकल इंजिनिअरिंगची पदवी प्राप्त केली. तदनंतर लंडन येथे नॉटिंगहॅम युनिव्हर्सिटी लंडन येथून एमबीए ही बिझनेस मॅनेजमेंटची पदवी प्राप्त केली आहे. त्यांच्या कुशल व्यवस्थापनाखाली विराज उद्योग समूहाची वाटचाल सुरू आहे. या संस्थेची स्थापना आमदार मानसिंगराव नाईक यांनी त्यांच्या क्रियाशील कर्तुत्वाकडे बघूनच केली आहे. या उद्योग समूहाच्या विकासाचा आलेख दिवसेंदिवस प्रगतीच्या दिशेने वाटचाल करत आहे. औद्योगीकीरणातील सुयोग्य व्यवस्थापनामुळे अल्पावधीतच विराज ग्रुप ऑफ इंडस्ट्रीजने बाजारपेठेत नावलौकिक प्राप्त केला आहे.

शिराळा विधानसभा मतदार संघाचे आमदार मानसिंगराव नाईक भाऊ यांनी विराज दादा नाईक यांच्यावर अल्पवयातच औद्योगिकीकरणाची जबाबदारी सोपवली. ती त्यांनी अतिशय उत्स्फूर्तपणे पेलून दाखवली. आपल्या ज्ञानाच्या जोरावर उत्तम प्रतीचे यश व त्या यशातील सातत्य टिकवून ठेवण्याची कर्तबगारी दाखवून दिली आहे. युवा वर्गाच्या विकासाला प्राधान्यक्रम देत सर्वसामान्यांच्या विकासाचा केंद्रबिंदू होऊन ते सध्या कार्यरत राहू लागले आहेत. सामाजिक कामातून युवा संघटन करण्यास त्यांनी सुरुवात केली आहे. सामाजिक कामाच्या माध्यमातून तरुणांचे प्रश्न समजावून घेऊन त्यावर तोडगा काढण्यासाठी परिश्रम घेत आहेत. समाजाला सोबत घेऊन पुढे चालणाऱ्या व समाजातील सर्व घटकांना न्याय देण्याचा प्रयत्न करणाऱ्या विराज दादा यांच्या स्वभावातील हे सामाजिक गुण आमदार मानसिंगराव नाईक यांच्या पावलावरती पाऊल टाकणारे आहेत.

आमदार मानसिंगराव नाईक यांचा राजकारणातील व समाजकारणातील प्रवेश तसा खडतरच म्हणावा लागेल. ज्या वेळेला राजकारणात आमदार मानसिंगराव नाईक यांनी प्रवेश केला त्यावेळेला संस्थांची अवस्था म्हणावी तशी नव्हती. विश्वास कारखाना कार्यक्षेत्रात उसाचे क्षेत्रही फार कमी होते. याशिवाय साखर कारखानदारी धोरणातील सततच्या बदलामुळे साखर उद्योग अडचणीतून वाटचाल करीत होता. अशा काळात कारखान्याच्या कार्यक्षेत्रात उसाचे उत्पादन वाढवण्यासाठी आमदार मानसिंगराव नाईक यांनी कारखाना कार्यक्षेत्रात नवीन लिफ्ट इरिगेशन संस्था उभारण्यात आल्या. महत्वकांक्षी डिस्टलरी प्रकल्पाची उभारणी अल्पावधीत पूर्ण करून उपपदार्थ निर्मितीतून साखर उद्योगास अधिक सक्षम करण्याचा प्रयत्न यशस्वी केला. साखर कारखान्याचे क्षमता वाढवण्याचे काम, यासह अनेक गोष्टी खडतर स्वरूपाच्या असताना आमदार मानसिंगराव नाईक यांनी त्या यशात रूपांतरित केल्या आहेत.

एकंदरीत औद्योगिकीकरणाची घडी बसवत असताना आमदार मानसिंगराव नाईक यांनी केलेला खडतर प्रवास विराज दादा नाईक यांनी अचूक टिपून घेतला. संस्था चालवत असताना धोरणात्मक निर्णय घेणे, ते धोरणात्मक निर्णय ऊस उत्पादक शेतकऱ्यांच्या व सर्वसामान्य नागरिकांच्या हिताचेच असले पाहिजेत यासाठी धोरणातील बारकावे अभ्यासू पणाने टिपून घेणे, हे अतिशय बारीक निरीक्षण विराज दादा यांच्या क्रियाशील व्यक्तिमत्त्वातून अभ्यासले गेले. त्यामुळेच एकीकडे शिक्षण चालू असतानाही त्यांनी त्याच कालावधीमध्ये विराज उद्योगसमूहातील व्यवस्थापनाची धुरा मानसिंग भाऊंच्या मार्गदर्शनाखाली यशस्वीपणे सांभाळलेली आहे.

अपुऱ्या ज्ञानाच्या भरवशावरती राजकीय-सामाजिक वाटचालही तोकडी व अपुरी राहणार हे निसर्ग सत्य आहे. त्यासाठी महान व्यक्तींच्या चरित्रांचा अभ्यास करणे, त्यांचा खडतर जीवन प्रवास पुस्तकांच्या रूपाने चिंतनात, मननात आणणे हे दादा नेहमीच करताना दिसून येत आहेत. शिराळा तालुक्यातील राष्ट्रवादीचा पडता काळ व चढता काळ या दोन्हींचा तुलनात्मक अभ्यास त्यांच्याजवळ आहे. सर्वसामान्यांच्या हिताची पक्षनेतृत्वाला जाण असेल तर नेहमीच पक्षाचा उज्वल भविष्यकाळ राहतो. यावर त्यांचा ठाम विश्वास आहे. त्यासाठीच आमदार मानसिंगराव नाईक भाऊ यांच्या मार्गदर्शनाखाली विकासाला एक पूरक दिशा देण्याचा अविरत प्रयत्न सुरू ठेवला आहे.सध्या कोरोना सारखी महामारी सर्वत्र भयानक स्वरूप धारण करून पसरू लागली आहे. अशा या भितीदायक वातावरणात स्वतःला लोकांचे पासून दूर ठेवून घेण्यासाठी अनेकजण प्रयत्न करत आहेत. परंतु आमदार मानसिंगराव नाईक भाऊ व विराज दादा दररोज विधानसभा मतदार संघातील गावे शासकीय प्रशासनाला सोबत घेऊन कोरोना प्रादुर्भाव दूर करण्यासाठी यंत्रणा राबवत आहेत. याशिवाय मतदारसंघातील सर्वसामान्यांच्या पर्यंत औषधांचा पुरवठाही मोठ्या प्रमाणात केलेला आहे. इतरांच्या सामाजिक, शैक्षणिक, औद्योगिक, कौटुंबिक उद्धाराकरिता अविरत परिश्रम घेत राहणाऱ्या युवा नेतृत्वाला वाढदिवसाच्या कोटी कोटी शुभेच्छा.

युवराज गायकवाड (जनरल मॅनेजर विराज ग्रुप ऑफ इंडस्ट्रीज)